Ingrid heidra for livslang og banebrytande innsats
I over 50 år har Ingrid Grønlie vore ei drivkraft for trygg og riktig legemiddelbruk – særleg for barn. Gjennom sitt mangeårige arbeid ved Sjukehusapoteket i Bergen og i Sjukehusapoteka Vest har ho sett varige spor i utviklinga av norsk sjukehusfarmasi. Nå vert ho heidra med Kongens fortjenstmedalje.
Ingrid Grønlie har i over 50 år vore ein utrettelig pådrivar for rett legemiddelbruk og utvikling av farmasifaget, med særleg fokus på behandling av barn.
Gjennom arbeidet ved Sjukehusapoteket i Bergen og på Barneklinikken ved Haukeland universitetssjukehus, har ho vore ei sentral kraft i arbeidet med å sikre trygg og tilpassa legemiddelbehandling for dei aller yngste pasientane.
Landets første barnefarmasøyt
Ho var den første faste farmasøyten ved ei barneavdeling i Noreg, og blir av mange omtalt som landets første barnefarmasøyt. Innsatsen hennar har vore avgjerande for etableringa av pediatrisk sjukehusfarmasi som fagfelt.
Ho var òg ein av grunnleggjarane av Nasjonalt kompetansenettverk for legemiddel til barn, der ho i fleire år var nestleiar.
Fagdirektør Christer Bakke Frantzen i Sjukehusapoteka Vest kjenner Ingrid godt, mellom anna frå dei tre åra han var apotekar ved Sjukehusapoteket i Bergen medan ho arbeidde der.
– Det er mange som har jobba med eller kjenner Ingrid frå tida hennar ved Sjukehusapoteket i Bergen og i Sjukehusapoteka Vest. Eg trur mange kjenner på både stoltheit og er rørte, og ikkje minst unnar henne denne velfortente utmerkinga, seier Bakke Frantzen.
Han legg til at Ingrid har sett djupe spor i norsk sjukehusfarmasi – gjennom bidrag til etableringa av kompetansenettverket, tett samarbeid med både nasjonale og internasjonale fagmiljø, og gjennom rettleiing av studentar.
Delte villig av si utømmelige kunnskap
Ingrid blir skildra som ei utømmelig kjelde til kunnskap for legar, sjukepleiarar og pasientar/pårørande – alltid tilgjengeleg og villig til å svare på komplekse spørsmål, nærast døgnet rundt.
– Som fagperson har vi opplevd Ingrid som varm, inkluderande, engasjert og uredd, alltid opptatt av å løfte andre og av å utvikle fagområdet legemiddel til barn på tvers av profesjonsgrenser
Ingrid pensjonerte seg i 2015, men heldt fram med å bidra med sin verdifulle kompetanse. Så seint som i 2019 var ho med på å ferdigstille retningslinjer for infusjonspumper og bidra til nye smerterettleiingar for barn.
Også internasjonalt har ho gjort seg bemerka, blant anna som initiativtakar til Scandinavian Paediatric Pharmacist Group, der hovudføredraget på den årlege konferansen er oppkalla etter henne: Ingrid Grønlies keynote lecture.